Clickonaruba.com

“Prepara bo skateboard y bin participa den Ciclovia”

Thursday, 09 September 2010 22:03 Written by Administrator

Den cuadro di actividad di Ciclovia den bario di Savaneta, un invitacion ta bay pa tur esnan cu tin un skateboard pa bin cu esaki, diasabra awor 11 di september 2010 pa 4:00 pm.Ta bay tin un lugar special dilanti Piscina Olimpico Roly Bislick pa tur esnan cu bin cu nan skateboard y sigur tambe por bay riba caminda sin ningun problema ya cu caminda ta cera pa trafico di motor.

Sucesor di Larry King ta priminti periodismo riguroso

Thursday, 09 September 2010 22:02 Written by Administrator

Piers Morgan, finalmente a confirma diaranson ultimo cu e lo bira e sucesor di e veterano anfitrion den talk show esta Larry King.
El a menciona esaki caba den un entrevista haci luna pasa durante di e entrega di premio Emmy y diaranson ultimo el confirma esaki un biaha mas den un entrevista e biaha aki hunto cu e presidente di CNN esta Jonathan Klein.
Kico televidentenan mester spera di e show nobo aki, cu lo cuminsa Januari, esey tabata e prome pregunta cu nan a haci Morgan. Di manera masha trankilo Morgan a bisa cu e lo kier pone CNN bek na number 1 den cantidad di hende cu ta wak e programa. Y tur esaki sin tin mester di expresa su opinion constantemente manera Glenn Beck of Bill O’Reily. Fuera di esaki ya caba e tin algun idea di ken e lo kier tin presente como su prome invitado den e programa.

Synergia entre “Musica di Jazz” y “Arte Visual”

Thursday, 09 September 2010 21:45 Written by Administrator

TAG 168, un fundacion local pa artistanan Arubiano, un biaha mas lo tene un exhibicion di arte durante e Caribbean Sea Jazz Festival 2010, exponiendo pinturanan, esculturanan y hasta poesia di artistanan local pa e duracion di e evento di dos dia. E punto culminante di e exhibicion lo ta un rifa, buscando un cas nobo pa e Pintura Cooperativo crea como resultado di trabou colaborativo, aña pasa, durante CSJF 2009.

E piesa a wordo traha pa varios artista local bon conoci, y e lo wordo rifa e aña aki como un treat special pa bishitantenan di e concierto. Organisadonan ta raporta cu artistanan lo ta biniendo hunto atrobe e aña aki pa crea un otro Pintura Cooperativo, na honor di CSJF 2010, pa wordo rifa otro aña. E Caribbean Sea Jazz Festival 2010 ta explora e relacion entre musica y e artenan visual, permitiendo ambos disciplina pa inspira publico y enrikece e cultura di nos isla. Mirando e obranan di arte bunita mientras cu nan ta scucha musica ta nutri e alma y sostene e spirito humano.

Tin un tremendo conexion entre Jazz y arte moderno, ya cu e manera di estar improvisacional di jazz tin e tendencia di conecta bon cu arte abstracto, cual ta menos restrictivo, y mas inovativo. E Caribbean Sea Jazz Festival ta treciendo hunto ambos, presentando un synergia cual ta inclui un exposicion di obranan traha pa Aruba su top artistanan, combina cu musica di artistanan local y internacional renombra.

IMF ta aplaudi acuerdo den Dialogo Social Aunke ta keda preocupa cu nivel di deficit presupuestario

Thursday, 09 September 2010 21:52 Written by Administrator

Economia di Aruba ta saliendo poco poco di un recesion severo. Esaki ta conclusion di IMF despues di a conclui su mission e siman aki na Aruba. Manera ta conoci, un delegacion di IMF a reuni cu diferente grupo e siman aki, pa asina haya un bista di e situacion financiero/economico di nos pais. IMF ta haci esaki riba propio peticion di Aruba.Segun e relato preliminary cu a keda publica ayera, turismo a mehora y e refineria ta programa pa cuminsa operacion pa fin di e aña aki. IMF a traha un relato di 25 punto, unda entre otro ta conseha pa mantene e maneho monetario di Aruba pa ta keda acomoda economia a termino corto. Sinembargo mester ta prepara pa reacciona rapidamente unabez cu demanda den sector priva pa creditonan recobra na nivel prome cu e crisis.IMF a aplaudi e dialogo social cu a resulta den un acuerdo den medidanan elemental cu a lo largo lo mehora e solidez financiero di Aruba, particularmente APFA y AZV. Di otro banda, IMF ta mustra si cu Aruba ta keda confronta e problema di deficitnan presupuestario cu mester keda soluciona den e context di un plan di consolidacion a termino medio.Bon Dia Aruba lo amplia riba e conclusionnan di IMF den nos edicion di mayan.

Reunion Mesa Rondo tumando lugar na Den Haag

Thursday, 09 September 2010 14:50 Written by Administrator

Awe tardi ora di Hulanda, lo tuma lugar un conferencia di prensa na Den Haag, Hulanda, caminda lo tuna resultado di e reunion di Mesa Rondo cu a tuma lugar diahuebs mainta den Ridderzaal na Binnen Hof na Den Haag.
Na e reunion a participa parlamentarionan di Aruba, Antias y Hulanda y na e ocasion aki Minister Presidente Mike Eman y Prome Minister Emily de Jong Elhage, tambe a hiba palabra. E reunion tabata culminacion di e discusionnan cu tin riba e cambio di Statuut relaciona cu cambionan den structura estatal di e islanan di Antias.