WILLEMSTAD – E establecimento local di KLM y Martinair pa area di Caribe bou di guia di Gerente General Simone Wickenhagen a logra e luna aki como esun prome den e empresa multinacional pa integra sin nachi tur seccion di ambos compania di aviacion.

For di e momento aña pasá ku KLM a bira 100% doño di Martinair, e dos companianan di aviacion a studia e metodo pa mescos cu na otro caminda nan sincronisa e forma di maneha e dos empresanan na Aruba y Corsou y pa haci esaki di e moda mas eficiente. Na e establecimento cu oficina na Corsou y Aruba esey a resulta den un organisacion uniforme tanto pa KLM como Martinair na Corsou y Aruba. Despues cu dos luna pasa ya a integra e oficinanan na e aeropuertonan, e personal di e dos companianan na e dos islanan a logra como prome den e net work mundial pa hinca e otro departamentonan tambe completamente den otro y pa sigui como unidad. For di februari e aña aki, ora a cuminsa cu e proceso aki, e oficinanan na e aeropuertonan Reina Beatrix na Aruba y Hato na Corsou a bay hunto. Entrante dia 1 di juli ultimo e oficinanan di benta di pasashi, e seccion pa atende vuelo na tera, e administracion y e seccionnan di mercadeo tambe a integra completamente.


E oficina principal di e establecimento Caribense ta keda na aeropuerto Hato, caminda KLM y Martinair tambe ta mustra pafo cu nan ta bou di mesun dak. Riba dak di e oficina ey tin e logo comercial nobo di e empresa. Nan ta keda dos brand riba mercado internacional, pero pa fin nan comercial nan a uni forsa y medionan. Gerente General Simone Wickenhagen di KLM-Martinair ta splica: “Tur dos marca ta keda existi banda di otro, pero for di awor cliente di tur dos por reserva y cumpra pasashi di tanto KLM como Martinair na e mesun oficina di benta”.