Busca bo Fresh Fit Meal y participa gratis den ‘Eclipse Zumba Party’
  Semper presente den iniciativa y proyecto na bienestar di salud y movecion, Subway ta uni cu e grupo di Step It Up Zumba pa asina duna mas hende e chens di participa den e grandioso evento cu lo tuma luga dia 29 di Juli proximo, esta e ‘The Twilight Saga: Eclipse Zumba Party.’ Tur interesa por probecha di e promocion excelente aki ya cu e ta masha facil. Djis pasa na bo restaurant Subway faborito y cu cada compra di un pannan cu ta cay bou di “ Fresh Fit”, e cliente por bay cu su recibo serca Step–it-Up y ricibi su entrada gratis pa les di zumba.
Step it Up su mision ta pa crea  movemento den e comunidad Arubiano treciendo programanan saludabel y innovativo di un manera responsabel, efectivo y agradabel. Di e manera aki kier laga tur hende adopta un estilo saludabel, cu ta e meta final.
E evento di Eclipse Zumba Party lo tuma luga na Parke Arawa y ta inclui presentacion di artistanan local manera Jonathann ‘Biggy Boy’ Thiel, Janiro Eisden, Popcorn Dancers y fire eaters. Musica y zonido lo ta den man di DJ Diablo cu lo percura tambe pa algun efecto special di luz y huma. Representantenan di bebida energetico ‘She’ tambe lo tey hunto cu esnan di Mary Joan Foundation.
Instructornan di fitness di e programa ‘Mission’ esta Carol Alders y Rene Wild lo duna un sesion di warm up di 20 minuut sigui pa e cinco instructornan di Step It Up Zumba den un sesion di zumba fitness di 90 minuut. Ademas di esaki nan lo ehecuta dos cancion di Biggy Boy y tres di Next Level/Basic One cu Janiro Eisden. Henter e lugar lo ta decora a la ‘Twilight Saga: Eclipse’ y ta pidi un y tur bin bisti den colornan cora, preto y blanco. Tin capacidad pa 250 participante, pesey mes, sigura bo inscripcion.
Pasa awe mes na un di e 8 localidadnan di Subway riba nos isla. Scoge for di Cura Cabai, Savaneta, Santa Cruz, Paradera, Renaissance Marketplace, Alhambra, Certified of Playa Linda y cumpra bo Fresh Fit Meal pa asina bo tambe ta den e Eclipse Zumba Party otro siman.